Psalms 44

Kumqondisi wokuhlabela. ElamaDodana kaKhora. Imasikili.

1Sizizwele ngezethu izindlebe, yebo Jehova; obaba basitshela owakwenzayo ezinsukwini zabo, ezinsukwini zekadeni.

2Ngezakho izandla wazixotsha izizwe wagxumeka obaba; wabahlifiza abantu wenza obaba baphumelela.

3Kwakungasizinkemba zabo ezathumba ilizwe, njalo kakusingalo yabo eyaletha ukunqoba; kwaba yisandla sakho sokunene, ingalo yakho, lokukhanya kobuso bakho, ngoba wawubathanda.

4UnguJehova wami loNkulunkulu wami, ophayo ukunqoba kuJakhobe.

5Ngawe siyazihlehlisa izitha zethu; ngebizo lakho siyazigxobagxoba izitha zethu.

6Angilithembi idandila lami, inkemba yami kayingiletheli ukunqoba;

7kodwa wena usipha ukunqoba phezu kwezitha zethu, abalwa lathi ubathela ihlazo.

8Siyazincoma ngoNkulunkulu ilanga lonke, njalo sizalidumisa ibizo lakho nini lanini.

9Kodwa manje ususilahlile wasiyangisa; kawusaphelekezeli izimpi zethu.

10Wasenza sahlehla phambi kwesitha, abalwa lathi sebethethe impango.

11Wasiyekela sadliwa njengezimvu wasichithachitha phakathi kwezizwe.

12Wathengisa abantu bakho ngengcosana nje awazuza lutho ngalokho kuthengisa.

13Ususenze saba lihlazo kubomakhelwane, inhlekisa lendumazo kwesihlalisene labo.

14Ususenze saba yisiga phakathi kwezizwe; abantu banikina amakhanda ngathi.

15Ukuyangeka kwami kuyangilandela ilanga lonke, ubuso bami buhuqwe ngehlazo,

16ngokuhozwa yilabo abangisolayo njalo abangenyanyayo, ngenxa yesitha esijonge ukuphindisela.

17Konke lokhu kwenzakala kithi, lanxa sasingakulibalanga kumbe asathembeka esivumelwaneni sakho.

18Izinhliziyo zethu zazingabuyelanga emuva; izinyawo zethu zazingaphambukanga endleleni yakho.

19Kodwa wasichoboza saba yikudla kwamaganyana, wasembesa ngomnyama omkhulu.

20Aluba sasesilikhohliwe ibizo likaNkulunkulu wethu loba saphakamisela izandla zethu kunkulunkulu wezizweni,

21kambe ngabe uNkulunkulu kakubonanga lokho na, njengoba esazi izimfihlo zenhliziyo?

22Ikanti ngenxa yakho wena sikhangelane lokufa ilanga lonke; sithathwa njengezimvu zokubulawa.

23Vuka, O Jehova! Ulaleleni na? Ziphaphamise! Ungasilahli kokuphela.

24Ubufihlelani ubuso bakho na, ukhohlwe ukuhlupheka kwethu lokucindezelwa?

25Sesibhuqwe phansi othulini; imizimba yethu isinamathele phansi.

26Phakama usisize; sihlenge ngenxa yothando lwakho olungaphuthiyo.
Copyright information for NdeIBE